Մեր պապենական հողերու պատմական արժէքները եւ աւանդութիւնները պահպանելու միտումով ամէն տարի կը կազմակերպուի Տոհմիկ Օրը:  Իւրաքանչիւր տարի, կ’ընտրուի հայրենի տարբեր տարածք մը եւ կը հրամցուին այդ տարածաշրջանի յատուկ ուտելիքները ու կը ներկայացուին տարազները, աւանդութիւնները, բարքերը, սովորութիւնները, հերոսները եւ երաժշտութիւնը:

Յանձնախումբը հսկայական աշխատանք կը տանի պատրաստելու համար տուեալ տարածքին մասին գրքոյկ մը, որ կը հրատարակուի եւ կը վաճառուի մասնաճիւղի վարչութեան կողմէ: Գրքոյկները կ’ընդգրկեն իւրաքանչիւր տարածաշրջանի աշխարհագրական եւ պատմական ակնարկը, քարտէսներ, լուսանկարներ, եզակի արուեստի գործերու պատկերներ, տարածաշրջանի նշանաւոր անձնաւորութիւններու կենսագրութիւններ, յօդուածներ, եկեղեցիներ, կրթական հաստատութիւններ, յուշարձաններ, տարազներ:

ՀՕՄի ընկերային ծառայութեան գրասենեակը կը մատուցէ ընկերային, նիւթական, ֆիզիքական եւ մտային առողջութեան մարզերէն ներս խորհրդապահական եւ անվճար աջակցութիւն գաղութիս բոլոր անդամներուն անխտիր:  Ծառայութիւնները կ’ընդգրկեն՝

•       ԱՇԽԱՏԱՆՔԱՅԻՆ` Գործի դիմումնագիրներ/ինքնակենսագրականներու պատրաստութիւն, աշխատանք փնտռելու եւ ծանօթութիւններ հաստատելու օժանդակութիւն:

·         ԲՆԱԿԱՐԱՆԱՅԻՆ՝ Բնակարանի ապահովում, ապաստարանի կամ կառավարական բնակարաններու փնտռտուք:

·         ՏԱՐԵՑՆԵՐՈՒ՝ Երկարաժամկէտ խնամքի հաստատութիւններու մօտ դիմում, CCAC, Wheel-trans եւայլն:

·         ԸՆՏԱՆԵԿԱՆ՝ Ընտանեկան խորհրդատուութեան յղում, իրաւական օժանդակութիւն, երեխայի խնամք եւ ընկերային օժանդակութիւն:

·         ԵՐԻՏԱՍԱՐԴԱԿԱՆ՝ Կամաւոր աշխատանքի առիթներու որոնում, ուսումնական դժուարութիւն ունեցող աշակերտներու օժանդակութիւն, կրթաթոշակներու դիմում:

·         ԼԵԶՈՒԱԿԱՆ՝ Դիմումնագիրներու եւ փաստաթուղթերու թարգմանութիւն եւ մեկնաբանութիւն ինչպէս նաեւ ESL դասերու աւանդում՝ նոր ներգաղթողներու համար:

Գրասենեակը կը գտնուի Հայ Կեդրոնի 2րդ յարկը: Կը գործէ երկուշաբթիէն ուրբաթ, առաւօտեան ժամը 10էն կ.ե. ժամը 2: Հեռաձայն՝ 416-495-0644 | Fax՝ 416-495-1729 | Ե-նամակ՝ [email protected]

Մասնաճիւղի գործունէութեան մաս կը կազմէ ՀՕՄի Ամառնային ճամբարը, ուր ութը շաբաթներու ընթացքին հայ մանուկներն ու պատանիները կ’ամփոփուին հայաշունչ, հաճելի եւ զուարթ մթնորլորտի մէջ, հայկական երգերով ու պարերով, շրջապտոյտներով, ձեռային աշխատանքներով, համակարգիչի գործածութեամբ կը լեցնեն իրենց ամառնային արձակուրդի օրերը:

4էն 14 տարեկան երեխաներու եւ պատանիներու համար, ճամբարը կը հանդիսանայ հիւրընկալ միջավայր մը, որակաւոր եւ վկայեալ անձնակազմի հսկողութեամբ, որոնք լաւապէս կը տիրապետեն հայերէն եւ անգլերէն լեզուներուն: ճամբաը կ’ընդգրկէ, մարզանքներ, խաղեր, երաժշտութիւն եւ պար: Շաբաթական յատուկ ուղեւորութիւնները երեխաներուն կ’ընծայեն յիշարժան փորձառութիւն:

Ճամբարը գանատահայ երեխային հնարաւորութիւն կու տայ հաստատել եւ պահպանել հայ մշակոյթի հետ իր կապը, ներշնչելով անոր ինքնավստահութիւն:

Յաւելեալ տեղեկութիւններու համար, այցելել www.arssummercamp.com կամ գրել` [email protected] հասցէին:

2010 թուականէն սկսեալ, մասնաճիւղը կը նշէ Կանանց Միջազգային Օրը, Մարտ 8ի նախորդող կիրակի օրը: Իւրաքանչիւր տարի կը հրաւիրուի կին բանախօս մը, որ գործի ասպարէզին մէջ մեծ յաջողութիւն ձեռք ձգած է:

INSPIRE ծրագիրը կը միտի թորոնթոհայ կանանց անհատական եւ մասնագիտական ​​զարգացման հնարաւորութիւններ ստեղծել: Ծրագիրը կ’ընդգրկէ դաստիարակչական միջոցառումներ ու աշխատանոցներ եւ կը համակարգէ մասնագէտի մը հետ անհատական հանդիպումները:

Յաւելեալ տեղեկութիւններ քաղելու համար այցելել` www.arsinspire.com կամ գրել` [email protected] հասցէին: