Ընկերային գետնի վրայ, ՀՅԴ ԳԵՄը աշխուժօրէն կ’աշխատի մէկտեղելու հայ երիտասարդութիւնը հայկական մթնոլորտի մէջ: Կազմակերպելով երգահանդէսներ, խրախճանքներ եւ պարահանդէսներ, միութիւնը իր կարելին կ’ընէ խանդավառելու համայնքի երիտասարդ տարրը: Այս ծիրէն ներս, յատկանշական են աւանդութիւն դարձած ամանորի երիտասարդական խրախճանքը (Christmas Disco), տարեկան պարահանդէսը եւ ամառնային խնճոյքը:

Հանրային ձեռնարկներուն կողքին, ՀՅԴ ԳԵՄը անդամներուն համար կը ստեղծէ ընկերային ճոխ միջավայր: Մտերմիկ հաւաքներու ընդմէջէն, միութեան անդամները կը ստեղծեն անմոռանալի յիշատակներ եւ ընկերային սերտ յարաբերութիւններ:

Ձեռնարկներէն նշենք՝ Գոհաբանութեան օրուայ եւ կաղանդի ճաշկերոյթները, ձմեռնային անդամական պտոյտը եւ Foosballի մրցաշարքը:

ՀՅԴ ԳԵՄը յատուկ աշխատանք կը տանի դաստիարակելու միութեան անդամները եւ առհասարակ հայ երիտասարդութիւնը: Սեմինարներու եւ ժողովներու միջոցով, անդամները կը ստանան Հայոց պատմութեան, Հայ դատի, ընդհանուր մարդու իրաւունքներու եւ Հայաստանի հետ առնչուող նիւթերու մասին դասախօսութիւններ, եւ առիթը կ’ունենան միտքեր փոխանակելու եւ ներկայացնելու նոր գաղափարներ:

ՀՅԴ ԳԵՄը նաեւ ջանք կը թափէ հայ երիտասարդին մօտ ստեղծելու եւ զարգացնելու հայութեան եւ Հայաստանի հետ առնչուող հարցերու շուրջ հետաքրքրութիւնը: Դասախօսութիւններու, կլոր սեղաններու, ընկերային ցանցերու եւ քարոզչական ծրագիրներու միջոցով համայնքի երիտասարդութեան կը տրամդրէ հայերէն լեզուի, մշակոյթի, պատմութեան եւ հայրենիքի մասին նիւթեր:

2011 թուականի ամրան, խումբ մը ՀՅԴ ԳԵՄականներ մեկնեցան Հայաստան եւ Վանաձոր քաղաքի մէջ իրականացուցին պատանեկան ճամբարի մը ծրագիրը՝ ՀՅԴ ԳԵՄ Վանաձորի ճամբարը։ Երկու շաբաթուան ընթացքին, 90 Վանաձորցի պատանիներ ու երիտասարդներ մասնակցեցան այս ճամբարին: Անոնք օգտուեցան ճամբարի անվճար եւ ճոխ ծրագիրէն, որ կ’ընդգրկէր համակարգիչի դասեր, անգլերէնի ուսուցում, արուեստի ու ձեռային աշխատանքի պահեր, ինչպէս նաեւ զանազան խաղեր: