Սուրբ Աստուածածին Հայաստանեայց Առաքելական եկեղեցին հոգեւոր եւ ազգային կեանք կ’ապահովէ մեր գաղութի զաւակներուն համար, վառ պահելով Քրիստոնէական հաւատքի եւ հայութեան արժէքներու տէրը դառնալու գիտակցութիւնը: Կառուցուած է 1990ին եւ 27 մայիս 1990ին, տեղի ունեցած է Անդրանիկ Պատարագը եւ եկեղեցւոյ օծումը՝ Սուրբ Աստուածածին անունով: Մինչ այդ, պատարագները տեղի կ'ունենային St. Augustine Anglican Churchի մէջ:

Եկեղեցին ունի երէցներու եւ կրտսերներու դպրաց դասեր, 10 ժրաջան յանձնախումբեր եւ շուրջ 250 կամաւոր ծառայողներ: Բարեսիրական գետնի վրայ, եկեղեցին օգտակար կը դառնայ դպրոցական կրթաթոշակներով եւ երէցներու, հիւանդներու եւ կարիքաւոր ընտանիքներու խնամատարութեամբ եւ օժանդակութեամբ: Կը ջամբէ քրիստոնէական դաստիարակութիւն՝ Սբ. Գիրքի սերտողութեան եւ Կիրակնօրեայ Վարժարանի միջոցներով:

Սբ. Աստուածածին եկեղեցւոյ հովիւն ու հոգաբարձութիւնը կը կազմակերպեն համերգներ, Սբ. Ծննդեան եւ Սբ. Յարութեան տօներուն առիթով՝ Սիրոյ Սեղաններ, տօնավաճառ եւ Սբ. Աստուածածինի Վերափոխաման տօնին ու Եկեղեցւոյ անուանակոչութեան զոյգ առիթներով՝ տարեկան քերմէս:

Եկեղեցին իր աշխոյժ մասնակցութիւնը կը բերէ միջ-յարանուանական աշխատանքներուն, անոնց ընդմէջէն նշելու կամ ոգեկոչելու համար ազգային, եկեղեցական ու աւանդական տօներն ու տարեդարձները: Սբ. Աստուածածին Հայաստանեայց Առաքելական եկեղեցին մշտական նեցուկ է Հայ Կեդրոնին ու կ’օժանդակէ անոր ի պահանջեալ հարկին։
Յաւելեալ մանրամասնութիւններու համար, այցելել www.stmarytoronto.com կայքէջը:

ՀՈԳԵՒՈՐ ՀՈՎԻՒՆԵՐ
Հայր Գեղարդ Ծայրագոյն Վարդապետ Քիւսպէկեան
Տէր Կոմիտաս Աւագ Քահանայ Փանոսեան